LAWESLAH BERITAKEN KINIRAJAN DIBATA
(MINGGU ZENDING GBKP)
(LUKAS 9:1-6)
Yesus mengutus kedua belas murid
9:1 Maka Yesus memanggil kedua belas murid-Nya, lalu memberikan tenaga dan kuasa kepada mereka untuk menguasai setan-setan dan untuk menyembuhkan penyakit-penyakit.
9:2 Dan Ia mengutus mereka untuk memberitakan Kerajaan Allah dan untuk menyembuhkan orang,
9:3 kata-Nya kepada mereka: “Jangan membawa apa-apa dalam perjalanan, jangan membawa tongkat atau bekal, roti atau uang, atau dua helai baju.
9:4 Dan apabila kamu sudah diterima dalam suatu rumah, tinggallah di situ sampai kamu berangkat dari situ.
9:5 Dan kalau ada orang yang tidak mau menerima kamu, keluarlah dari kota mereka dan kebaskanlah debunya dari kakimu sebagai peringatan terhadap mereka.”
9:6 Lalu pergilah mereka dan mereka mengelilingi segala desa sambil memberitakan Injil dan menyembuhkan orang sakit di segala tempat.
Ibenaken ibas kekelengen ras perkuah ate Tuhan nari, Reh IA ku doni enda, muat rupa sekalak kawan (hamba), ngenanami kiniseran, seh mate i kayu persilang lako nebusi manusia si perdosa, janah berita enda harus ipeseh man kerina bangsa (Yoh 3:16, Filipu 2:1-11, Mat 28:19-20). Tugas enda harus idalanken seh ku bas pendungi zaman pagi, i bas kerehen Jesus pedua kaliken ku doni enda. Dahin enda enggo ibenaken ras iajarken ngelakokensa, mulai sangana i doni enda denga Tuhan Jesus e, padahal paksa e lenga bo pe erkedungen dahin keselamten e idahikenNa, sebab lenga ia mate, keke ras nangkih ku surga; bagi si ituriken ibas perikop PJJ-nta wari enda.
Ibas ertambahna kalak si tek man Tuhan paksa e, reh buena si man elan, i je terbuka kesempaten man ajar-ajar guna mperakteken kai si ipelajarina, lako ngelai meritaken berita, berita kerna Kinirajan Dibata. Alu bage man Kata Dibata labo terjeng ibegiken ras ipelajari ngenca, tapi idalanken bas kegeluhen ajar-ajar Tuhan lebe bas paksa e. Malah ilatih pe ia guna ndalankensa.
Si man beritaken e me kerna Kinirajan Dibata si enggo reh ku doni enda. Berita enda banci teraloken kalak, e me adi ajarena e ipeseh rikut ras tanda-tandana. Kalak si ngalokenca tersampat secara pertendin bage pe perdagingen. Jadi, mulai ibas zaman Tuhan Jesus nari, pelayanen enda enggo ilakoken secara holistik (menyangkut kerina dampar kegeluhen, kula ras tendi), engkelini arah kerina dampar kegeluhen. Janah enda memang jadi kuan-kuan i tengah-tengahta, maka “Adi cakap ngeca labo lako”. Tentu adi bage harus ngenda ilakoken i bas persadan si nteguh ras Tuhan, sebab IA nge ulu gegeh i bas si enda (Yohanes 15:5). E maka harus mengandalken Tuhan, la banci beluhta si baba bas ndahiken dahin enda.
Jenari pesan Tuhan Yesus, ibas keberkaten ajar-ajarNa, maka la perlu ibaba kai pe,sebab Tuhan kari sincukupkensa kerina. Ula baba tongkat: e me jadi alat bantu bas dalan medalit jadi ciken ras banci jadi senjata. Tongkat i bas erti kekuasaan ntah pe jabaten, Tuhan saja siandalken bas geluh ras pendahin pelayanenta. Bage pe kerna kebutuhen sehari-hari, Tuhan si ncukupken kita, Janah dahin enda idalanken alu pola kegeluhen si sederhana. Ula kari erkiteken keborosenta enggo kita jadi beban man kalak si jadi alamat pelayanenta. Janah mungkin pe guna menghindari pengakap bas paksa e, maka lit ka nge kalak si nehken pelayanen guna ndatken keuntungen, cari makan.
Bage pe kerna sikap geluh ibas pergaulen bas ingan tading, subuk ibas kita, bage pe i bas rumah ingan tading, harus jadi anggota warga ras keluarga si ertanggung jawab. Mbue kita ertoto kerna kuta ras ingan tading e gelah sangap ia jenari, tetap meriah ukurna kerna kehadirenta i bas ingan e. Tentu adi la sue kata, situasi ras perbahanen, tentu banci la sitabehen, jenari sipandangen, kedungenna rubat. Tentu e pe jadi penghalang ibas dahin meritakten Berita Si Meriah. Harus ka nge kita lebe teraloken kalak bas pergaulen maka teralokensa berita si ibaba kita e.
Adi la lit si ngaloken kita ibas kuta e, ikatekenna ijenda maka tadingken saja kuta e ras sapui abu si lit i bas nahendu, janah e pagi jadi saksi maka kita enggo reh erberita ku kuta e, janah la ialokenna. Tentu adi bas konteks si genduari banci ka nge lit bedana ras tas konteks Tuhan Jesus nari. Sebab adi genduari banci dengan ka lit waktu si deban banci kita reh ku kuta e. Janah banci lit denga ka cara pendekaten si deban sipake guna erbertita bana. Janah memang adi itulakna lalap, maka labo kita situlakna e, tapi Tuhan itulah (Lukas 10:16). Ertina maka ibas erberita tah pelayanen enda arus isehken alu dem kekelengen ras kesabaren. Memang adi terus kari itulakna, e maka bagi kata ayat enda ka nge kedugnena. Tapi ula kita terlalu emosional ibas pelayanen.
Dage arah oratenta enda kita ipersingeti maka i bas ateta melayani Tuhan, harus ngenda kita erlajar ras melatih diri, gelah sikap ndahiken dahin e. Contohna i bas gerejanta GBKP melala enggo sikembangken metode-metode Pekabaran Injil (PI), e me:
- Metode pendekatan budaya: kita banci er-PI arah perkade-kaden. Nehken Kata Dibata ibas dahin-dahin adata, i bas kecedaan ate ras sidebanna
- Metode PI pendekatan pemberdayaan ekonomi: alu ngajari pertanian, peternakan, ras sidebanna.
- Metode PI pribadi alu Eta Erberita Si Meriah (EE), ija alu metode metode enda kerina kita anggota ngawan ni perpulungen ipengasup guna er-PI alu sitematis/terang langkah-langkahna ras la mesera nehkenca.
- Bage pe metode PI Elegan, i ja alu cara si sukah banci kita tukar pikiren ras penganut agama si deban kerna dalam keselamaten bas agamana ras bas agamanta. Carana elegan ras terhormat, la menyinggung perasaan tapi Injil e enggo ibegina. Janah bas si e Tuhan nge si erbahan maka turah kinitekenna, adi kita labo ngasup erbahan kalak tek.
Bage pe arah perikop enda ngingetken kita, maka enggo 128 tahun kita ngaloken Berita Si Meriah, menai 18 April 1890 i Buluh awar, tapi seh asa genduari lenga lit kita ngutus sekalak misinionaris pe ku daraten GBKP. Padahal sieteh maka lit 128 suku bas Indonesia mulai sabang nari seh ku Marauke, si terabaiken denga ibas Berita Si Meriah. Pengetin suku terabaiken; suku si lenga lit ije Gereja tah pe lembaga PI si banci nehken Berita si Meriah bana. Memang enggo lit temanta kerja sama guna mpersiapken si enda, e me OMF ras lembaga misi si deban. Tapi mesera denga muat jelmana guna banci i utus. Enda labo harus Pendeta tah pe si latar belakang sekolah Teologi, tapi banci nge kaum awam pe ipersiapken.
Emaka apai kita nggejapken terpanggil guna nehken Berita Kerna Kerajaan Dibata enda, banci kam ngata ku runggun, Klasis tah Moderamen guna banci kam ipersiapken jadi utusen ku peta-peta si lenga nandai Tuhan Yesus i babo doni enda.
EVALUASI
Kuga nge pendalanken kerna aksinta minggu si enggo lewat?
DISKUSI
- Adi si nen bas perikop enda, seh kal pentingna iakap Tuhan Jesus dahin meritaken Berita Si Meriah e, seh maka lampas kal ipersiapken/ilatihNa ajar-ajarNa guna si e. Adi si nen bas Gerejanta genduari, uga nge siakap pentingna dahin PI enda, si teridah arah pendalankenta bage pe arah buena anggaren Gerejanta si pake guna dahin e? Turikenah!
- Murid Tuhan Jesus/ kalak Kristen si mehuli e me kalak si mesikel rusur ersaksi kerna keselamaten si lit ibas Guruna, e me Berita Si Meriah tah Injil. Guna meningkatken semangat ras kengasupenta ibas meritaken Berita Si Meriah e, la anci lang arus mbue kita erlajar/erlatih guna er-PI enda. Tapi kai nge siidah penghalang i bas kita ngelakoken ras ngikuti pelatihen e? jana h uga si ban pekenesa? Turikenlah!
AKSI
Sirarihken gelah ibahan min pelatihen er-PI bas Runggunta enda si banci min kita ilatih kerina anggota ngawan ni Perpulungen i bassa.
USULEN LAGU
- KEE GBKP NO: 68:1-3
- KEE GBKP NO: 257:1-2
- KEE GBKP NO: 300:1-3
- KEE GBKP NO: 295:1-3
Pdt. Kongsi Kaban, S.Th