Bahan PJJ 11-17 Febuari 2018

February 12, 2018 Writer-1 PJJ Sektor, Sektor Betlehem, Sektor Filipi, Sektor Galilea, Sektor Hermon, Sektor Kana, Sektor Korinti, Sektor Roma, Sektor Yerusalem 0

PULAHILAH BANGSANA

(TOPIK: POLITIK, KONFESI GBKP, REALITA PERPOLITIKAN)

LUKAS 4:18-19

4:18 “Roh Tuhan ada pada-Ku, oleh sebab Ia telah mengurapi Aku, untuk menyampaikan kabar baik kepada orang-orang miskin; dan Ia telah mengutus Aku

4:19 untuk memberitakan pembebasan kepada orang-orang tawanan, dan penglihatan bagi orang-orang buta, untuk membebaskan orang-orang yang tertindas, untuk memberitakan tahun rahmat Tuhan telah datang.”

Sekitar Juni 2018, ialoken me PILKADA serentak i bas 171 daerah (17 Propinsi, 115 Kabupaten ras 39 kota i bas erbage-bage daerah i Indonesia. Tentu saja, lit daerah i ja ngawan GBKP ikut muat bagin ibas pemilihen enda. Ibas realita si bagenda rupana, gereja arus ngasup nempatken dirina alu payo ras bijaksana gelah ngasup berperan jadi sira ras terang man doni enda. Tambah si e, selaku ngawan GBKP kita ikut menciptaken gelah min politik (Pilkada) ula min sebatas kesempatan ndatken jabaten ras kuasa, tapi sebalikna jadi kesempaten ncidahkan Kinirajan Dibata (Dibata si jadi Raja) i doni enda. Ngawan GBKP arus megermet nandangi gemerlap Pilkada si ncidahken erbage-bage situasi si banci mabai kita ndabuh ku bas cara rukur gendek-gendek ras ndatken untung sesaat. Gereja arus ngasup menahan diri gelah ula sempat ndabuh ku bas politik uang, mindo dana man calon Gubernur, Bupati ras Walikota guna dahin gereja. Tole si man jagan ula sempat jadi perpecahen i bas perpulungen aminna gia la bali pilihenta. Pilihenta banci la seri, tapi pusuhta tetap sada e me mpermuliaken Tuhan segedang-gedang geluhta. Sanga pemilihen e, tentu lit keberpihakenta ku salah sada calon si kin siakap kita ngasup maba kiniulin ku daerahta, tapi ula kal sempat keberpihakenta e erbanca kita lanai siangkan ras lanai si hangken. La seri pilihenta e hal biasa, e maka arus kita dewasa ngaloken perbedaan pilihen e.

Ise pe pilihenta arus min ia erkemalangen man Tuhan, sitandai alu payo rekam jejakna. Lit perbahanenna si mehuli man jelma si nterem, ngasup rembang tengah mengayomi kerina suku, agama, ras, begepe antar golongan (SARA) gelah tetap ersada i bas bingkai NKRI, Bhineka Tunggal Ika, UUD 1945 ras Pancasila. Pemimpin si iarapken kita eme pemimpin si berjuang guna kesehjatraan rakyat si rulo si ipimpinna. Ia erdahin guna jelma si enterem, labo guna dirina sendiri gelah ndatken jabaten ras kuasa saja. Tapi ia arus erdahin guna kiniulin kuta ras rakyat sipimpinna. Ngasup min ia njaga kebebasen beragama, berusaha, menciptaken rasa aman man kerina rakyat, pendidiken si terjangkau, biaya kesehaten si terjangkau, erga-erga kebutuhen pokok stabil, infrastruktur si mehuli, ngelai masyarakat alu tutus ras adil, ras sidebenna. Intina ia erdahin guna kiniulin jelma si enterem. Dikune bagenda caranta rukur ras bertindak, kita enggo jadi sira ras terang doni janah politik si jadiken jadi sarana kesaksin menghadirken Kinirajan Dibata i doni enda.

Arapenta enda banci sibandingken ras kai siilakoken Jesus i bas bahan PJJ-nta sekali enda. Seh kenca Jesus I Nasaret, lawes me IA ku bas Rumah Pertoton, I je tedis Jesus ngogeken Kitab Nabi Jesaya. Ayat enda nuduhken kerna misi Jesus reh ku doni enda e me guna mulahi jelma si tek baNa arah erbage-bage perbebena nari. Bahan PJJ nta ibenai alu kalimat:”Kesah Tuhan lit i babongKu”. E ngatakenca maka Kesah Tuhan me si jadi pendorong ras gegeh Jesus ibas IA ndahiken dahin si iendesken Bapana man baNa, labo gegehNa sendiri. Kesah Tuhan e me si mpengasup Jesus ndahiken misiNa I doni enda. Alu bage kehadiren Tuhan arah Jesus lako ernanam man isi doni enda. Keterpilihen Jesus labo sebatas ndatken jabatan entah kuasa saja.Tapi lebih asa si e, keterpilihen Jesus alu gegeh arah Kesah Tuhan e gelah IA erdahin, erguna ras ernanam man jelma si enterem. Lit empat (4) dahin si jadi msi Jesus e me:

  • Maba Berita Si Meriah man kalak si musil.
    Misi Jesus enda pe banci si idah i bas Matius 5:1-12 “Khotbah Jesus I datas uruk”. Berita si Meriah isehken man kalak si musil: lemah, la erpegegeh, enggo mulai bene pengarapenna. Arah ialokenna berita si meriha e, tambah me gegehna ras semangatna si mbaru.
  • Erberita man kaka si tertaban maka ipulahi me ia.
    Enterem denga jelma tertaban baik secara daging kula bage pe perukuren. Jesus reh maba berita pembebasen e gelah baban geluhna banci reh nahangna (bdk. Matius 11:18-20).
  • Janah kalak si pentang erpengidah me.
    Kerehen Jesus mbuka mata enterem jelma gelah si idah uga belinna keleng ate Dibata man isi doni enda. Lanai lit aru ateta sabab alu matanta jine si idah tanda perkuah ateNa I bas diri Jesus Kristus.
  • Kalak si itindas ipulahi me.
    Jesus maba berita si mereken kegeluhen man kalak si tertindas. Jesus mulahi kita I bas ketertindasenta nari alu negakken keadilen, kebenaren, ras kebujuren. Alu bage hak-hak nggeluh kerina jelma terjamin.

Enda me pendahin Jesus lako ncidahken masana Tuhan mulahi bangsaNa. Pulah i bas erbage-bage situasi ras belenggu si menghambat produktivitasta, lanai kita ngasup erdahin alu tutus, si ngolani kita muji ras mpermuliaken Tuhan, pulah i bas kekoten rukur ras kinitekenta (bdk. Tema). Guna si e, Jesus setia ndahiken misiNa I doni enda, enda enggo teridah ras teruji. KesahNa pe iberekenNa gelah si datken kemalemen ate nggeluh. Jesus nggeluh mereken usihen man jelma si nterem uga patuh man Tuhan ras aturen agama. Jesus pe mereken ajaren man pemimpin agama ras pemimpin bangsa uga arusna ndahiken dahinNA alu tutus mperdiateken jelam si nterem. Jesus enggo merken usihen kai arus silakoken selaku warga ras kai ka arus ilakoken selaku pemimpin.

Arahen Program GBKP e me:”Menumbuhkan dan Meningkatkan Kesadaran Warga GBKP Dalam Bidang Politik, Hubungen Dengan Masyarakat dan Pemerintah.” Janah i bas Pokok-Pokok Pengakuan Kiniteken (KONFESI) GBKP BAB VIII-POLITIK, isingetken i je:

Kami percaya, bahwa :

  • Politik merupakan upaya untuk menata kehidupan masyarakat demi kesejahtraan bersama.
  • Politik menjadi sarana kesaksian dan alat untuk menghadirkan Kerajaan Alah di tengah masyrarakat.
  • Gereja menolak setiap upaya partai politik, sekelompok orang atau perorangan yang menjadikan gereja sebagai kendaraan politik.
  • Dalam pentas politik, gereja hadir sebagai “garam dan “terang” baik dalam proses pencerahan masyarakat, mengkritisi kebijakan dan memberikan pertimbangan dalam pengambilan keputusan-keputusan politik.
  • Gereja dipanggil untuk menyiapkan warganya untuk diutus dalam politik.

Si lima (5) poin enda me jadi kiniteken GBKP ibas hubungenna ras politik janah i bas palas enda me gerejanta erdalan ras ncidahken sikap politikna. Erdandanken si e, iarapken gelah kerina ngawan GBKP ras kerina Serayan Tuhan ngangkai Konfesi GBKP enda gelah arah ras batasen-batasen sikapta nandangi politik. Dahinta bagi siilakoken Jesus. Bagi Jesus maba kiniulin man isi doni, bage me pe kita iajuk muat bagin I bas pesta demokrasi, rehlah kita ku TPS, sehken soranta (ikut nyoblos). Adi pilihenta kalak si erkiniteken ras mehuli ukurna, ia me pagi jadi temannta ngukuri kai si mehulo man bangsanta ras daerahta masing-masing. Terakap kal di kune lit “temanta” ibas bidang pemerintahan, jadi anggota dewan ras sidebanna. Uga pa pe ingetna nge pagi nampati kiniulin kuta kemulihenna, si milih ia, si nampati ia sanga pelaksanaan Pilkada e. Si mehulina, kenca ia terpilihlah maka si pinda mbuktiken janji si enggo ibelaskenna gelah ngasup ia jadi sira ras terang doni enda ras ngasupken ia menghadirken Kinirajan Dibata i daerah i ja ia erdahin. Reh  teremna kaa si tek man Tuhan si terpilih (menjabat) reh memungkinken terjadi kiniulin kuta ras kesejahtraan  man rakyat si ipinpinna. Daramilah calon-calon pemimpin si meniru cara kerja Jesus si nampati,mpenahangi baban, si mbebasken ras erguna man jelma si nterem.

 

EVALUASI:
Uga kerna aksita minggu si lewat? Lit nge kemajunna.

DISKUSI:

  1. Adi Jesus, setia IA ndalanken misiNA I doni enda guna mulahi kerina manusia i bas erbage-bage belenggu kelabujuren ras keladillen. Kai nge si banci si pelajari arah Jesus gelah kita pen ngasup meneladani kai si ilakoken Jesus i bas geluhta si tep-tep wari?
  2. Uga nge si ehulina sikapta ngalo-ngalo Pilkada serentak ras uga ka bentuk dukungenta nandngi calon-calon si ikut Pilkada gelah jadi sira ras terang man doni enda?

AKSI:

  1. Ikut muat bagin ibas pesta demokrasi ibas wilayahta masing-masing
  2. Totoken kesuksesan pelaksaan Pilkada serentak.
  3. Jaga kiniersadaan perpulungen, ula sempat terpecah erdandanken berbeda pilihenta.

USULEN LAGU:

  1. KEE GBKP NO: 71:1-3
  2. KEE GBKP NO: 209:1,2,4
  3. KEE GBKP NO: 303:1-3
  4. KEE GBKP NO: 212:1,4,5

TOPIK PERTOTON SYAFAAT:

  1. Notoken pelaksanaan Pilkada serentak erdalan alu aman, damai ras masyarakat dewasa ngaloken ras mendukung ise pe si terpilih ibas wilayahta masing-masing
  2. Notoken gelah kerina calon ras tim suksesna si ikut jadi peserta Pilkada serentak njaga keutuhen NKRI, ula min terjadi saling adu domba sada ras sidebanna.
  3. Notoken gelah ngawan GBKP si lit daerahta ngikuti Pilkada serentak muat bagin nehken hak pilihna alu langung, umum, bebas, rahasia (LUBER)
  4. Si turah ibas perpulungen.

Pdt. Jekson Barus, M.Th.

Post Views: 315