Dibata Ngukumsa Kalak Si Erlua – Lua
( Efesus 5 : 1 – 5 )
Hidup sebagai anak-anak terang
5:1 Sebab itu jadilah penurut-penurut Allah, seperti anak-anak yang kekasih
5:2 dan hiduplah di dalam kasih, sebagaimana Kristus Yesus juga telah mengasihi kamu dan telah menyerahkan diri-Nya untuk kita sebagai persembahan dan korban yang harum bagi Allah.
5:3 Tetapi percabulan dan rupa-rupa kecemaran atau keserakahan disebut sajapun jangan di antara kamu, sebagaimana sepatutnya bagi orang-orang kudus.
5:4 Demikian juga perkataan yang kotor, yang kosong atau yang sembrono–karena hal-hal ini tidak pantas–tetapi sebaliknya ucapkanlah syukur.
5:5 Karena ingatlah ini baik-baik: tidak ada orang sundal, orang cemar atau orang serakah, artinya penyembah berhala, yang mendapat bagian di dalam Kerajaan Kristus dan Allah.
“Erkiteken kam anak-anak Dibata, la patut terjadi i tengah-tengahndu erlua-lua, erlagu la mehuli ntah pe merangap; ibelasken pe ola”
(Efesus 5:3)
Labo ndauh senuan kentang , nina kuan-kuan kalak Karo ertina adi mejile bibit kentang e (“berkualitas”), kenca isuanken batang kentang e pe mejile, buahna pe meramis. Andingken ku bas kegeluhen, adi bapa ras nande mehuli, (“berkarakter baik”), la banci lang nusur kange karakter si mehuli e man anak-anakna. Biak anak-anak e nusur kap bas orang tuana nari (Like father, like son). Adi Dibata me jadi bapanta, tentu bas kita pe lit biak Dibata. Uga dage arusna caranta geluh gelah arah kita teridah biak Dibata e? Paulus mpersingeti anggota perpulungen i kuta Epesus, si nai lenga kin tandaina Dibata emaka geluhna bebas lalit aturenna, tapi gundari enggo jadi anak-anak Dibata, anak-anak si Badia erkiteken Kristus. Selaku anak-anak Dibata, nina Paulus, lakokenlah bagi si ngena ate Dibata, gelah teridah biak Dibata e arah perbahanen kerina anak-anakNa. Biak Dibata eme kap keleng ate. Jadi Anak anak Dibata min nggeluh bas keleng ate, bagi Kristus enggo engkelengi kita, dingen ngendesken kesahNa man gunanta. Ia enggo mpersembahken diriNa jadi persembahen si merim si ngena ate Dibata (ayat 2). Keleng ateta e palasna ku bas keleng ate Kristus, la erbalas, la lit syaratna, nggit mere diri guna kiniulin kalak sideban.
Kenca ikataken Paulus uga seharusna nggeluh anak –anak Dibata, iberekenna sada perintah larangen bagi si tertulis bas pedah sepuluh. Lit ije kalimat ‘la patut i tengah-tengahndu erlua-lua.’ kalimat e petembil ras erkeleng ate si jadi biak anak Dibata. Kalak si erlua-lua lalit bas ia keleng ate, kai siibahanna e kejahten si luar biasa i bas mata Dibata. Sebab Dibata enggo njadiken manusia sekalak dilaki ras sekalak diberu, ipersadaNa duana jadi sada kula ras ipasu-pasuNa. Biak Dibata e setia, janah ateNa pe anak-anakNa si enggo ipersadakenNa pe nggeluh setia, termasuk man pasangenna pe setia. Kalak si la setia man pasangenna, labo pernah mehuli jabuna, ras ulihna, bas jabu e turah me dosa.
Lit sada kasus bas sada keluarga, ija sekalak nande meteh maka perbulangenna erlua-lua ras diberu si deban, tupung e anakanakna kitik-kitik denga. Sedakkal pusuh nande e, bagem igengkenna ngepkep anak ras jabuna. Sepuluh tahun kenca sie, si nande pe dungna nuriken perbahanen bapa man anak-anakna seh maka kecewa kal anak-anakna man bapana ras turah me segat ate. Lanai lit relasi si mehuli antara bapa ku anak bagepe bapa ku nande. Enda me ulihna jabu si nilah arah sura-sura Dibata, turah erbage-bage dosa : nembeh ate, lanai erkuan, merawa bas pusuh, erelem-elem, turah pinakit (HIV/AIDS) ras sidebanna.Janah reh Buena pe torah lesbian, gay, biseksual ras transgender LGBT pe lit hubungenna erkiteken la harmonis hubungen jabu.
Tole nari nina Paulus, kalak si erlua-lua e situhuna sura-surana kal ngenca idalankenna, uga akapna meriah e sijadi perayakenna, keluargana ras masyarakat sekelewetna lanai diatena, kalak si bage sura-surana e jadi dibatana, ras labo ndigan pe bengket ku bas kerajan Dibata (ayat 5) . Situhuna kerajan Dibata enggo isikapken man kerina anak-anakNa, tapi adi la nggeluh bagi biak Dibata la kita bengket ku bas kerajan e (bdk. Tema).
Mulihlah kita ku Dibata bapanta, IA melias ras dem perkuah ate, ialemina kalak si robah dingen jera bas geluhna. Cidahkenlah biak Dibata e i bas geluhta si teptep wari.
EVALUASI :
Uga evaluasi aksinta Minggu si lewat !
DISKUSI :
1. Turiken pengangkanndu kerna keleng ate anak-anak Dibata erpalas ku bas keleng ate Kristus!
2. Dibata pagi ngukumsa kalak si erlagu la mehuli bage pe si erlua-lua. Adi si perdiateken kasus sekalak nande ndai, sikawitken ras kalimat si datas e, payo nge tindaken nande e i bas nuriken perbahanen perbulangenna man anakanakna ? Uga kin searusna?
3. Kai nge ndia runggana, maka biak Dibata e lenga terida, bas geluhta si teptep wari?
AKSI :
Sada minggu enda sicidahken dage biak Dibata man isi jabuta, engkelengisa alu la ngarapken balasen i bas ia nari.
USULEN LAGU :
1. KEE GBKP NO: 217:1-2
2. KEE GBKP NO: 317:1-2
3. KEE GBKP NO: 222:1,7
4. KEE GBKP NO: 330:1-3
TOPIK PERTOTON SYAFAAT :
1. Gelah perpulungen ngasup encidahken biak Dibata bas geluhna si tep-tep wari.
2. Jabu-jabu si la harmonis gelah mulihken ku bas keleng ate Dibata (lit pengampunen ras peneriman).
3. Si turah bas perpulungen.
Pdt. Nurbety Br Ginting, M.Th