Silangndu Kumuliaken
( 1 Johanes 2 : 21 – 25 )
2:21 Aku menulis kepadamu, bukan karena kamu tidak mengetahui kebenaran, tetapi justru karena kamu mengetahuinya dan karena kamu juga mengetahui, bahwa tidak ada dusta yang berasal dari kebenaran.
2:22 Siapakah pendusta itu? Bukankah dia yang menyangkal bahwa Yesus adalah Kristus? Dia itu adalah antikristus, yaitu dia yang menyangkal baik Bapa maupun Anak.
2:23 Sebab barangsiapa menyangkal Anak, ia juga tidak memiliki Bapa. Barangsiapa mengaku Anak, ia juga memiliki Bapa.
2:24 Dan kamu, apa yang telah kamu dengar dari mulanya, itu harus tetap tinggal di dalam kamu. Jika apa yang telah kamu dengar dari mulanya itu tetap tinggal di dalam kamu, maka kamu akan tetap tinggal di dalam Anak dan di dalam Bapa.
2:25 Dan inilah janji yang telah dijanjikan-Nya sendiri kepada kita, yaitu hidup yang kekal.
Kegeluhenta manusia la terlepas arah kiniseran ntahpe perbeben. Amin gia megati kiniseran ntahpe perbeben e reh banci saja erkiteken perbahanen si ilakoken manusia, misalna ia ipenjara erkiteken nangko, “korupsi” ntahpe tindaken-tindaken “kriminal” si debanna. Janah banci ka nge kiniseran ras perbeben e reh man banta erkiteken kita mpertahanken si mehuli ras kebenaren Kristus ibas kegeluhenta. Tentu la banci lang arus nge kita ngalaken kiniseran ras tantangen e ibas geluhta. Labo kita banci nilah ntahpe kiam ibas kiniseran ras perbeben e. Tapi sebalikna maka kita iuji ibas ngalaken kiniseran ras perbeben e. Pengujin e tentuna lako “mengukur” seh ija nge gegeh, kengasupen ras kesabarenta ngalaken kerina kiniseran ras perbeben si reh man banta e.
Ibas masa pelayanen si ilakoken Jesus, kiniseran ras perbeben megati kal ihadapiNa. Kiniseran e labo erkiteken perbahanen si salah ntahpe kelepaken si ilakoken Jesus. Tapi kiniseran tupung i kayu persilang ialoken Jesus erkiteken Berita Keselamaten si ibaba Jesus la teraloken jelma si nterem e. Alu bage banci si idah maka kiniseran ras penderitan Jesus jadi erkiteken meritaken berita keselamaten ras Kinirajan Surga man kerina jelma (bdk. Matius. 4:17). Janah lit nge kalak si lA setuju nandangi kai si iberitaken Jesus e. Terlebih-lebih tupung Jesus ngataken maka Ia me si ngkuhi padan Dibata e. Erkiteken sie me kedungenna Jesus arus ngaloken Kiniseran ibas geluhNa.
Hal sienda ka me si ipetangkas Johanes man banta, maka selaku kalak si tek man Kristus arus pang ngalaken kiniseran ibas geluhna. Kiniseran e reh man kalak si tek erkiteken ia arus mpertahanken kebenaren e ibas geluhna. Tentu banci turah penungkunen man banta, kai kin kebenaren e? Ibas Alkitab Edisi Study ituriken maka kebenaren si imaksudken ibas ayat 21 emekap kerna kematen ras kekeken Jesus Kristus si enggo naluken dosa ras kematen ibas geluh manusia. Sie mpetangkas maka Jesus e situhuna eme Anak Dibata si iutus Dibata reh ku doni enda lako jadi gancih ibas kerina dosa si ilakoken manusia. Hal si enda ituriken lako banci mperjelas man pengajaren. Pengajaren sesat si turah ibas paksa sie si ngatakensa maka Jesus e labo Mesias si ipadanken Dibata (bdk. ayat 22). Alu bage jelas kal maka surat Johanes enda mulihi mpeteguhi kiniteken manusia nandangi kebenaren kerna Jesus e ibas tengah-tengah geluhna. Em sabapna maka kerina kalak si tek pe ngalaken kiniseran ibas geluhna.
Tole pe ipetangkas man banta, maka kalak si ateNa ersada ras Kristus, arus me ipersilahangNa bana dingen ipersanNa kayu persilang Kristus (Matius. 16:24). Enda nuriken man banta maka kiniseran ras kematen Jesus Kristus i kayu persilang arus jadi usihen man jelma si nterem e. Kalak si tek arus nggit dingen pang mersan kayu persilang e, jenari iberitakenNa kemulian Kristus arah kayu persilang e. Alu bage kita selaku kalak si tek si enggo ipilih Dibata, ngasup ngidah kemulian Dibata ibas kiniseran ras kematen Jesus. Sie kerina ialoken Jesus erkiteken keleng ateNa si mbelin man kalak si tek man Tuhan. Enda me si iperingeti ibas wari Jumat Si Mbelin, wari ija Tuhan Jesus Kristus mereken diriNa guna isalipken segelah kerina manusia banci ngaloken keselamaten ibas dosa-dosa si ilakokenNa. Ibas wari Jumat Si Mbelin me Jesus engkorbanken diriNa alu ngamburken darehNa si Badia segelah manusia banci ngaloken keterkelinen ibas geluhna.
Ibas konteks kegeluhenta genduari tentu pengorbanen Jesus lanai cukup terjeng si peringeti saja ibas geluhta. Tapi la banci lang arus lit si banci silakoken sebage tanda maka kita enda pe enggo ikut mersan kayu persilang Kristus ibas geluhta. Tentuna tanda ntahpe buktina arus teridah ibas kerina perbahanen si ilakoken manusia tep-tep wari. Ertina maka manusia arus ngelakoken perbahanen-perbahanen si mehuli ibas geluhna sebage tanda maka ia enggo ngaloken keterkelinen ibas Dibata nari. Ibas salah sada contoh misalna kalak Kristen aruslah ngasup erkorban nandangi kalak si deban. Erkorban enda tentu labo saja soal materi entahpe kiniliten-kiniliten ibas kita. Tapi alu litna kepedulian dingen nggit sisampat-sampaten enda ngajuk kita reh ngasupna ngerembakken diri man Dibata. Pengorbanen si ilakoken Jesus aruslah jadi “inspirasi” man banta guna erkorban dingen ngelakoken si mehuli ibas geluhta. Emaka si jadikenlah pengorbanen Jesus e jadi pengorbanen si mbelin ibas geluh kalak si erkiniteken. Alu bage, arah pengorbanen Jesus e kita pe banci reh buena ngelakoken perbahanen-perbahanen ras kiniulin-kiniulin si mbelin ibas geluhta selaku manusia.
Selamat merenungken pengorbanen si enggo ilakoken Jesus man banta. “Soli Deo Gloria”.
EVALUASI :
Uga ulih aksi si enggo si lakoken ibas minggu si lewat?
DISKUSI :
- Arah bahan renungen PJJ-nta wari enda, kai dage erti kematen Jesus e ibas kinitekenta?
- Kalak si atena ikut ras Jesus maka ia pe arus ikut mersan kayu persilang Kristus. Perbahanen-perbahanen kai si banci si lakoken tandana kita pe ikut mersan kayu persilang Kristus e? Diskusikenlah!
TOPIK PERTOTON SYAFAAT:
- Ngawan ni perpulungen ngergaken keselamatan si enggo ialokenna.
- Gelah ngawan perpulungen tetap nggeluh ibas kinitekenna.
- Reh tambahna pengangkan perpulungen kerna sakramen.
- Siturah ibas perpulungen.
AKSI :
Nehken penampat man perpulungen si medanggel kegeluhenna tandana kita nggit erkorban man kalak si deban.
USULEN LAGU :
- KEE GBKP NO: 207:1-7
- KEE GBKP NO: 211:1-5
- KEE GBKP NO: 125:1-4
- KEE GBKP NO: 328:1-3
Pdt. Dicky Bangun, S.Th