Runggu Simetunggung
(Perbahanen Rasul – Rasul 15 : 6 – 12 )
| 15:6 | Maka bersidanglah rasul-rasul dan penatua-penatua untuk membicarakan soal itu. |
| 15:7 | Sesudah beberapa waktu lamanya berlangsung pertukaran pikiran mengenai soal itu, berdirilah Petrus dan berkata kepada mereka: “Hai saudara-saudara, kamu tahu, bahwa telah sejak semula Allah memilih aku dari antara kamu, supaya dengan perantaraan mulutku bangsa-bangsa lain mendengar berita Injil dan menjadi percaya. |
| 15:8 | Dan Allah, yang mengenal hati manusia, telah menyatakan kehendak-Nya untuk menerima mereka, sebab Ia mengaruniakan Roh Kudus juga kepada mereka sama seperti kepada kita, |
| 15:9 | dan Ia sama sekali tidak mengadakan perbedaan antara kita dengan mereka, sesudah Ia menyucikan hati mereka oleh iman. |
| 15:10 | Kalau demikian, mengapa kamu mau mencobai Allah dengan meletakkan pada tengkuk murid-murid itu suatu kuk, yang tidak dapat dipikul, baik oleh nenek moyang kita maupun oleh kita sendiri? |
| 15:11 | Sebaliknya, kita percaya, bahwa oleh kasih karunia Tuhan Yesus Kristus kita akan beroleh keselamatan sama seperti mereka juga.” |
| 15:12 | Maka diamlah seluruh umat itu, lalu mereka mendengarkan Paulus dan Barnabas menceriterakan segala tanda dan mujizat yang dilakukan Allah dengan perantaraan mereka di tengah-tengah bangsa-bangsa lain. |
I bas kegeluhen perpulungen perlu kel ipersada pengangkan kerna kai-kai saja ajaren ras dahin-dahin gereja si man dalanenken. Pengangkan si petembil sada ras si debanna megati turah i tengahtengah perpulungen, si enda wajar erkiteken kecibal anggota ngawan ni perpulungen pe sada ras sidebanna labo bali. I bas litna pengangkan ras sura-sura si petembil e, mahan bana banci turah perjengilen seh pe perubaten ras perpecahen i tengah-tengah perpulungen. Segelah ula sempat turah perubaten e maka perlu kel irakut kiniersadan e me arah runggu. I bas runggu e me icakapken kai-kai saja kin sura-sura ras persoalen si lit, seh idatken arih ersada. Gereja perlu erlajar arah sidang/runggu i Jerusalem siilakoken anggota perpulungen, Rasul-rasul ras pertua-pertua i bas ndungi perjengilen si lit i bas perpulungen. Pengangkan si petembil ulihna e me perjengilen si mesangat. Lit pengajaren kalak Jahudi si enggo Kristen (kalak si reh i Judea nari ku Antiokia) ngajarken man kalak si la Jahudi tapi enggo tek man Jesus eme, nina “Labo kam terkelin ibahan Dibata adi la kin kam isunatken bagi iaturken Undang-Undang Musa.” Pengajaren kalak enda ilawan Paulus ras Barnabas tuhu-tuhu seh jadi perjengilen si mesangat nandangi kalak si la Jahudi. I bas ndungi persoalen enda teridah me orat geluh rasul-rasul ras pertua-pertua i bas ngelakoken sidang i Jerusalem:
- Ersada arih lako erbahan sidang i Jerusalem.
- Pulung me rasul-rasul ras pertua-pertua i bas sidang e.
- I bas sidang e ibereken kebebasen man tep-tep anggota sidang lako nuriken pengangkanna ras iergaken.
- Tep-tep kalak si ngerana dem alu kepentaren, Rasul Petrus,
Paulus, Barnabas ras Jakub enggo ersada pengidahna kerna persoalen e. Kalak si la Jahudi labo perlu i sunat, sabab erpalas ku bas kinitekenta, keterkelinen e rehna erkiteken lias ate Tuhan Jesus nandangi kalak Jahudi bagepe si la Jahudi.
- Sidang enda erkedungen alu ndatken arih ersada.
La lit persoalen si la terdungi adi nggitlah kita encakapkenca ras alu dem kepentaren, labo mpejang-jang bagi sura-suranta saja i bas ngerungguisa. Adi e si terjadi maka runggu e pe banci sontar.
Selaku kalak Karo tentuna enggo semal pe man banta kerna runggu. Kai-kai saja pe nuate idahiken (peradaten, persoalen si turah i bas jabu ntah kuta) si pemenana ilakoken e me runggu. Runggu i tengah-tengah kalak Karo ertujun arih-arih muat si mehuli guna kiniulin pekepar (tama uli man kerinana) ras dahin entah persoalen kai gia irasken ndungisa desken sada aron ndungi sada dahin. Orat geluh si icidahken kalak si runggu maka ikataken runggu e metunggung e me:
- Dahin ntah persoalen si man runggun ken e eme dahin ntah persoalenna ras-ras, e maka i bas ndungisa pe arus irasken.
- Kalak si runggu la si tualen, i bas runggu e arus iatanken sangkep nggeluh pekepar.
- Kalak si runggu dem kehamaten, siergan pekepar.
- Nggit ‘rawin njemba’ ertina la mpejangjang sura-surana saja tapi nggit sisuruten.
- Kiniersadan runggu icidahken alu penggejapen “Kam kap aku. Aku kap kam”.
- Tep-tep sangkep nggeluh muat bagin ras ietehna kerna kecibal ras dahin si man dahinkenna.
- Tep-tep sangkep nggeluh iikutina runggun e seh dung, seh enggo idatken arih ersada.
Tuhu-tuhu mehuli kel sipakeken orat runggu perpulungen i Jerusalem bagepe biak-biak runggu rikutken orat nggeluh kalak Karo enda i bas tep-tep ngelakoken runggu/sidang-sidang i tengahtengah gerejanta.
Tep-tep kalak si bengket ku bas runggu/sidang-sidang gereja, nggejap min maka kerina kap aron Dibata. Sada aron singelakoken ‘runggu simetunggung’ teridah arah:
- Penggejapen maka sada juma ingan erdahin/ngelai.
- Sada Tuan si mereken dahin e, e me Tuhan Jesus.
- Sada pengidah kerna kai kin si jadi perayaken (tujun/”goal”) i bas ndahiken dahin e. Si jadi tujun e me meritaken Berita Si Meriah, majekken Kula ni Kristus, mulahi doni enda i bas kiniseranna nari.
- Sada si mereken upah/ulih, e me Tuhan.
- Tep-tep i bereken kesempaten ngerana, sehkenlah alu dem kehamaten ras kiniteruken ukur.
- Ngergaken tep-tep kalak si ngerana tupung nehken usulen ntah masukenna.
- Ikutilah runggu e seh erkedungen.
Erbage-bage biak, pengkebet, pengangkan ras pemere si lit i bas ngawan ni perpulungen. I bas si enda me maka guna mpersada ras guna kiniraturen i tengah-tengah perpulungen perlu kel irungguken alu metunggung. Segelah ulihna pe tama pujin man Tuhan ras maba kemalemen ate nandangi kerina ngawan ni perpulungen.
Salah sada kesempatenta lako banci encidahken ‘runggu simetunggung’ enda eme i bas Musyawarah Warga Sidi Runggun, si ilakoken sekali setahun. I bas Musyawarah Warga Sidi Runggun enda anggota perpulungen (simewakili), serayan, pengurus kategorial ras unit/seksi si lit pulung ras-ras lako mereken masuken-masuken. Masuken-masuken e seh perluna guna iputusken i bas Sidang Majelis Runggun ras ijadiken program i bas kerina dahin-dahin gereja.
EVALUASI :
Uga aksinta kerna perpulungen jabu-jabunta si lewat?
DISKUSI :
- Orat geluh si kuga nge si lit i bas rasul-rasul ras pertuapertua tupung ngelakoken sidang i Jerusalem?
- Orat geluh si kuga saja nge si arus lit i bas kalak si ikut/peserta i bas runggu/sidang maka banci icidahken ‘runggu simetunggung’?
AKSI :
Ngelakoken runggu simetunggung i bas sektor lako encakapken laporen Musyawarah Warga Sidi Runggun ras mpersada usulen i bas tep-tep anggota ngawan nari
USULEN LAGU :
- KEE GBKP NO : 209:1,4,5
- KEE GBKP NO : 71:1,3
- KEE GBKP NO : 354:1-3
- KEE GBKP NO : 296:1-3
- KEE GBKP NO : 297;1 , 2
TOPIK PERTOTON SYAFAAT :
- Segelah kerina anggota ngawan GBKP ras serayan Tuhan nggejapken maka kerina sada aron i bas ndahiken dahin Tuhan.
- Persoalen-persoalen si lit i tengah-tengah GBKP banci kerina idungi i bas runggu simetunggung.
- Segelah perdalinen Musyawarah Warga Sidi Runggun i belang-belang GBKP erdalan alu mehuli, encidahken biak runggu si metunggung.
- Si turah i bas perpulungen
Pdt. DR. Kalvinisius Jawak